మెట్టా నాగేశ్వరరావు
ఇస్త్రీపెట్టె (కవిత)

ఎనిమిదేసి కళ్లేసుకుని

పక్కమీద

బుజ్జికుక్కలా  దూకుతుంది మా ఇస్త్రీపెట్టె!

ముడతబట్టని చలువజేసే

దానిని చూస్తే

సంఘసంస్కర్తలు కళ్లలో మెదులుతారు!

బట్టల్లోంచి

నాలుగుమెతుకులు రాలుతాయని

నాన్న అన్నప్పుడు అర్థం కాలేదు

నాలుగు శాల్తీలను ఇస్త్రీ చేసినపుడు

చేతిలో మోగిన పైసలగంటల్ని విన్నాక

కొంచెం కొంచెంగా బతుకు అర్థవంతమైంది!

బల్లమీద ఇస్త్రీచేస్తూ

ఒక్కోసారి పరధ్యానమైతే

చురకవేసి అప్రమత్తత నేర్పేది

పిల్లలొచ్చి ఇస్త్రీపెట్టెమీద

నీళ్లుచుక్కలు చల్లితే

కాక తగ్గిస్తారని కాబోలు

‘చుయ్ చుయ్’ మంటూ చిరాకుపడేది!

సారంలేని బొగ్గులేస్తే

సుస్తీచేసినట్టు మందంగ నడిచేది

తుమ్మవో తాటివో బొగ్గులేస్తే చూడాలి

మొద్దుబట్టమీద కూడ

లేడిపిల్లలాగ పరుగులు పెట్టేది!

మా ఇంట్లోనూ దేవుడున్నాడు

ఆయన ఇస్త్రీపెట్టె అవతారమెత్తాడు

రోజూ నిద్రలేవగానే

దైవదర్శనంలా ఇస్త్రీపెట్టె దర్శనం!

చేసిన డిగ్రీయేమో

జీవనానికి ఖాళీగంపగా మిగిలినపుడు

ఉద్యోగంకోసం

గాలిపటాన్నై తిరుగుతున్నప్పుడు

పిలిచి కొలువునిచ్చిన

ఈ ఇస్త్రీపెట్టె నా జీవితానికి పెద్దవరమంటాను!

బతుకుదెరువును చూపించిన

ఈ ఇస్త్రీపెట్టె ఋణంతీర్చుకోలేనని తెలుసు

కనీసం దాని అస్థిత్వాన్ని తుప్పుపురుగు తినకుండా

ప్రేమగా చాలా బాధ్యతగా

పూలశాలువ కప్పి దాచుకున్నాను! “

https://www.facebook.com/1393080854146321/posts/2279188198868911/

———–