| పేరు (ఆంగ్లం) | Ganteda Gowru Naidu |
| పేరు (తెలుగు) | గంటేడ గౌరు నాయుడు |
| కలం పేరు | – |
| తల్లిపేరు | సోములమ్మ |
| తండ్రి పేరు | గంటేడ సత్యంనాయుడు |
| జీవిత భాగస్వామి పేరు | జానకి |
| పుట్టినతేదీ | 07/08/1954 |
| మరణం | – |
| పుట్టిన ఊరు | విజయనగరం |
| విద్యార్హతలు | – |
| వృత్తి | ఉపాధ్యాయుడు |
| తెలిసిన ఇతర భాషలు | – |
| చిరునామా | – |
| ఈ-మెయిల్ | – |
| ఫోను | – |
| వెబ్ సైటు / బ్లాగు పేరు, లంకె | – |
| స్వీయ రచనలు | అవతలి ఒడ్డు ఆసరసాల ఇది చేదు కథ కాదు ఏటిపాట ఒక రాత్రి రెండు స్వప్నాలు కాటు కొండమల్లె గెంజిమెతుకులు చొక్కాగుడ్డ కోసం జీవసూత్రం తిరుగుడు గుమ్మి దేవుడూ వర్ధిల్లు నరాలు తెగుతున్న నేల నాణెంకిందచీమ నీటిముల్లు |
| ఇతర రచనలు | – |
| ఈ-పుస్తకాల వివరాలు | |
| పొందిన బిరుదులు / అవార్డులు | చాసో స్ఫూర్తి సాహిత్య పురస్కారం ఎస్.బి.ఎస్.ఆర్. కళాపీఠం సాహిత్య పురస్కారం జ్యేష్ట లిటరరీ అవార్డు ఎస్.ఆర్.కృష్ణమూర్తి స్మారక సాహిత్య పురస్కారం మాడభూషి రంగాచార్య స్మారక సాహిత్య పురస్కారం విశాలసాహితి పురస్కారం పొట్టిశ్రీరాములు తెలుగు విశ్వవిద్యాలయం ధర్మనిధి పురస్కారం పొట్టిశ్రీరాములు తెలుగు విశ్వవిద్యాలయం ఉత్తమకథా పురస్కారం ఉమ్మడిశెట్టి సాహితీ అవార్డు పి.టి.ఆర్.స్మారక కవితా పురస్కారం పోలవరపు కోటేశ్వరరావు స్మారక సాహిత్య్ పురస్కారం రాచకొండ రచనా పురస్కారం గురజాడ సాహితీ పురస్కారం |
| ఇతర వివరాలు | – |
| స్ఫూర్తి | – |
| నమూనా రచన శీర్షిక | నా తిత్తవ |
| సంగ్రహ నమూనా రచన | బురద కుమ్మి బురద బుక్కినోళ్ళ మాట మట్టి వాసనే వేస్తుంది మరి నా కవిత్వ పాదాలను ముట్టుకుంటే వేళ్ళకు మట్టి అంటకుండా ఎలా వుంటుంది…… |
గంటేడ గౌరు నాయుడు
బురద కుమ్మి బురద బుక్కినోళ్ళ మాట
మట్టి వాసనే వేస్తుంది మరి
నా కవిత్వ పాదాలను ముట్టుకుంటే
వేళ్ళకు మట్టి అంటకుండా ఎలా వుంటుంది
నా పదాలను పలకరిస్తే పశువులను పలకరించినట్టు
నా పలుకులను పరామర్శిస్తే
చేలనూ నాగేటి చాళ్ళనూ పరామర్శించినట్టు
నా మాటలు సాటవల సందళ్ళు
సామెతల సందిళ్ళు
నా పాటలు సెమట పూల పందిళ్ళు
చలిమంటల కుందిళ్ళు
గైని తీసి నా తల్లి బాస కళ్ళంలో అడుగుపెడితే
తెలుస్తుంది నా పలుకుబడి
నివ్వెర పరుస్తుంది నా నానుడి
నా నాడుల్లో నాగావళి అలల జడి
జంఝావతి అలజడి
వంశధార వరద ఉధృతి అంచనా వేయాలనుకుంటే
వొడ్డున నిలబడి చూస్తే చాలదు
లోతు చూడాలంటే ఈత తెలియాల్సిందే
మట్టిని గురించిన ఎరుకలేని వాడికి
సేద్యం ఎలా సాధ్యమవుతుంది?
పదం పదును తెలియనోడికి
పద్యం ఎలా పట్టుబడుతుంది?
కవిత్వం ఒక బెడ్డ దుక్కి
ఆ రహస్యం పోతనకు తెలుసు
మడిసెక్కలో మొక్కల్ని
మెదడు ముక్కలో మహావాక్యాలని
ఏకకాలంలో రచించే ప్రతీవాడూ ఒక పోతన
నిత్య కృషీవలుడు నిరంతర స్వాప్నికుడూ కదా కవీ!
నేను కవిని
మట్టిలోంచి మొలకెత్తిన వాణ్ణి
మట్టి కోసం ఎలుగెత్తిన వాణ్ణి
చెట్టు చిగురు చూసి కాయ వగరు
అలల తీరు చూసి ఏటి పొగరు చెప్పగల వాణ్ణి
వేళ్ళతో భూమిని చివుళ్ళతో ఆకాశాన్ని వొడిసిపట్టి
చూపుల్ని సూదులు చేసి
చినుకుల దారాలతో కలిపి కుట్టేవాణ్ణి
నేను కవిని
మట్టి గుండె చప్పుడు నా భాష
మర్మమెరగని మోటుదనం నా యాస
యాస నా నేల శ్వాస
నా పలుకు పంచదార
నా పేరు కళింగోర
గురజాడ అడుగుజాడలో నా నడక
గిడుగు నీడలో నా పడక
తూర్పులో పొడిచిన తొలి వెలుగు రేక
నా భుజాన కస్తవా!
ఇదిగిదిగీ నా తిత్తవ.
———–
