దేవరాజు రవి

దేవరాజు రవి ప్రముఖ కథకుడు, నవలాకారుడు, సినిమా సమీక్షకుడు. తెలుగులో తొలి డిటెక్టివ్ నవల ‘వాడే వీడు’ రచయిత అయిన దేవరాజు వేంకటకృష్ణారావు ఇతనికి తండ్రి.

జీవిత విశేషాలు
ఇతని అసలు పేరు దేవరాజు వేంకట సత్యనారాయణరావు. ఇతడు విజయనగరం జిల్లా మృత్యుంజయనగరం గ్రామంలో 1939, ఏప్రిల్ 5వ తేదీన జన్మించాడు[1]. ఇతని స్వస్థలం బరంపురం. ఇతడు 12 నవలలు, 200 పైగా కథలు, 1250 సినిమా సమీక్షలు ఇంకా పలు ఇతర వ్యాసాలూ వ్రాశాడు. మొదటిసారిగా 1959లో రామం అనే నవలను రచించాడు. అప్పటి నుంచి ప్రారంభమైన ఇతని రచనా వ్యాసంగం చివరిరోజు వరకు కొనసాగింది. ఇతడు మూడు కవితా సంపుటాలు, రెండు కథా సంపుటాలు వెలువరించారు. సితార, శివరంజని, మేఘసందేశం, నంబర్ వన్ సినిమా పత్రికలలో ఇతడు చేసిన సమీక్షలు సినీ వర్గాల ప్రశంసల్ని పొందాయి. ఇతడు నంది అవార్డుల కమిటీలో రెండుసార్లు సభ్యుడిగా ఉన్నాడు. ఇతడు సామాజిక కార్యకర్తగా కూడా విశేషంగా కృషిచేశాడు. ఎంతోమంది కుష్టు రోగులకు స్వయంగా సేవ చేశాడు. లెప్రసీ డాక్టర్‌గా ఏరికోరి ఉద్యోగం చేసి, పదవీ విరమణ అనంతరం కూడా ఆ సేవల్ని కొనసాగించాడు. ఇతడు మేఘసందేశం అనే సినీవారపత్రికకు సబ్ ఎడిటర్‌గా పనిచేశాడు. ఇతడు ఆంధ్రపదేశ్ సినీక్రిటిక్స్ అసోసియేషన్, ఆంధ్రప్రదేశ్ సినిమా రచయితల సంఘం మొదలైన సంస్థలలో సభ్యుడిగా ఉన్నాడు.

రచనలు
నవలలు
రామం
సంగమం
ఎడారిలో కోయిల
కొత్త వెలుగు
కసి
మేము సైతం
వెన్నెల కురిసింది
చీకటి దీపాలు
ఏకాంకిక
కొత్త వెలుగు
కవితా సంపుటులు
వేగుచుక్క
ఇది హృదయం
కథా సంపుటులు
దేవరాజు రవి కథలు[2]
బతుకే బంగారం (దేవరాజు సీతతో కలిసి)
కథలు
ఇతని కథలు చిత్రగుప్త, కథాంజలి, వినోదిని, ఢంకా, కృష్ణాపత్రిక, ఆంధ్ర సచిత్రవారపత్రిక, ఆంధ్రజ్యోతి, ప్రగతి, తరుణ, స్వాతి, స్నేహ, జయశ్రీ, అనామిక, పల్లకి, జనసుధ, మధురిమ, సినీప్రభ, జోక్స్, జైదండోరా, నెలవంక, తారాపథం, ఆనందజ్యోతి, మధురవాణి, కొరడా, కాగడా, ఆదర్శరైతు, విజయసారథి తదితర పత్రికలలో ప్రచురించబడ్డాయి. వాటిలో కొన్ని తమిళ, కన్నడ భాషలలోకి అనువదించబడ్డాయి.

———–