డి.వి.రమణి
రవంత స్వార్ధం

మా [ఇంటి మహా] లక్ష్మి
“ఎన్ని టెస్ట్స్ చేస్తేనేమి ! పిల్లలు జాతకంలో లేకపోతే పుట్టరు, ఎన్ని ఆసుపత్రులు తిరిగిన, ఎన్ని గుళ్ళు గోపురాలు తిరిగి ఏ దేముళ్ళకి మొక్కిన ఒకటే… “అదే ఈసడింపు, అదే ఛీత్కారం ఏళ్లుగా !
ఎప్పుడు ఉండేదే అయినా బాధేసింది… ఈ చక్రవాక రాగం వినలేక పోతోంది.
లోపలికి వస్తుంటే వినిపించింది అయ్యో పాపం! ఎండకి వచ్చిందే, పొద్దుననగా వెళ్లి, రాగానే, “ఏమైంది డాక్టర్స్ ఏమన్నారు “అని ఆప్యాయంగా అడిగి ఒక గ్లాసుడు మంచి నీళ్ళు ఇవచ్చుగా ! ఆ గుళ్ళకి తిప్పింది ఆమె, ఇప్పుడు డాక్టర్స్ చుట్టూ తిప్పుతున్నఈ ఆమె! మా లక్ష్మి అంటూ చెప్పేటప్పుడు మా ఇంటి మహాలక్ష్మి అంటూ అది వ్యంగ్యం అని అర్ధం అవటానికే చాల కాలం పట్టింది.
చాలా నీరసంగా అనిపించి ఫ్రిడ్జ్ లొంచి నీళ్ళు తీసుకుని తాగాను, మామయ్య అంటున్నారు ,” ఎందుకే ఎప్పుడూ ఆలా ఆడిపోసుకుంటావు? పాపం ఎంతగా వాడి పోయిందో”
ఆ మాట పూర్తికూడా కానీకుండా,” అంత గారం అవసరం లేదులే, ఏ కొండ రాళ్లు కొట్టి రావట్లేదు, రెండు వీధుల అవతలున్న హాస్పిటల్ కే వెళ్ళింది “
వంట గదిలోకి వెళ్లి చూసాను, అందరూ తినేసి, ఆరాంగా ఉన్నారు , మరి ఈ పిచ్చి బావ ఎక్కడో? తిన్నాడో లేదో !?
అనుకుంటూ గదిలో చూస్తే లేడు , బాల్కనీలోనూ లేడు, పెరటిలో కెళ్తే అక్కడ బాదంచెట్టు కింద, మంచం మీద పడుకుని, పెడెస్ట్రల్ ఫ్యాన్ పెట్టుకుని ‘యర్రంశెట్టిగారి , హ్యూమరోలోజి “ చదువుకుంటూ నవ్వుకుంటున్నాడు ….కొన్ని క్షణాలు చూస్తూ ఉండి పోయాను.
ఆలా చూడగానే ముందు కోపం ఆ తర్వాత జాలి కలిగాయి. ఏ దిగులు ఏ చింత లేవు ఎప్పుడు బిందాస్ గా ఉంటాడు, అలా దిగులు పడాలి అని గాని, ఆలోచించాలి అని తెలియని అమాయక చక్రవర్తి!!! దునియా దారి తెలీదు, బక్క కోపం.
కోపం వస్తే ఎంత మాటన్నా అనే ఆ తీరు తప్పు ఒప్పులు పక్కన పెడితే ఒకరకం గా చేతకాని మంచితనం ఉన్న మనిషి.
ఆ అమాయకత్వమే నాకు బావలో నచ్చింది, దానికి నిజానికి పెళ్లి చేసుకోనక్కర్లేదు. కానీ, నాకు తెలియకుండా బావ అంటే ప్రేమ వయసుతోబాటు పెరిగి పోయింది. నిజానికి అది ఇదిగో ఈ అత్త పుణ్యమే!
అమ్మకి ఈమె , గురించి తెలుసు కనక, ససేమిరా అంది ,” నీకు తెలీదురా బేబీ, మీ అత్త ఆ నక్క జిత్తులు అతి తెలివి, వొద్దురా తల్లి , నా మాట విను, ప్లీజ్ కష్టపడతావ్, అన్ని నేను వివరించలేను. పెళ్లి అంటే ఇద్దరికీ మాత్రమే సంబంధించింది కాదు అది ” .
“బావ మంచివాడు అమ్మ, అత్త నన్నేమి చెయ్యగలదు? పైగా నేనంటే ప్రత్యేకం అత్తకి అంది, మా ఇంటి మహాలక్ష్మి ఎప్పుడొస్తావ్ అంటూ ఉంటుంది ” కొంచెం గర్వంగా.
అప్పుడు పెద్ద అత్త, తన కొడుకు, రాంమోహన్ కి చేసుకుంటాను అంది అంత ఏజ్ గ్యాప్ ఉన్నా, పెద్ద బావకి నాకు 15 ఏళ్ళు తేడా కనక “ ఎమోషన్స్ ఈక్వల్ గా ఉండవు” అని పెద్దలు నిర్ణయించారు.
బావ ఎంతో అనునయంగా చెప్పాడు, అప్పటికే పెద్ద బావ మంచి జాబ్ చేస్తున్నాడు.
‘బేబీ చూడరా వాడితో నీకు లైఫ్ లో ఏ విధమైన సంతోషం ఉండదు, మా ఫ్రెండ్ వాళ్ళ అంతా యూ. య స్ . లో ఉంటారు , అతని తమ్ముడు డాక్టర్, పైగా నిన్ను ఇష్టపడుతున్నట్టు చెప్పాడు కూడా. నా మాట విను బంగారం నువ్వు సరే అంటే మాట్లాడతాను వాళ్ళు ఇండియా వస్తున్నారు ” ఎంతో నచ్చచెప్పే ప్రయత్నం చేసాడు.
అప్పుడు పెద్ద బావకి తలొంచుకుని చెప్పాను ,” లేదు బావ అలా ఆలోచించద్దు ప్లీజ్ సూరి బావంటే నాకు ఇష్టమే. చిన్నప్పటినించి అనుకోవటం వలన మనసులో బావే ఉన్నాడు, నేను మనసారా ఈ పెళ్లి చేసుకుంటున్నాను “ దృఢంగా చెప్పాను
విని బావ నా వైపు చాలా జాలిగా చూసాడు
… అది ఆకర్షణో, మోహమో, ఇష్టమో, అభిమానమో! ఎదో తెలీని భావం నన్ను కట్టేసింది…. ఎంతగా అంటే వెనక్కి రాలేనంతగా అని చెప్పలేక పోయింది.
ఇంకో వారంలో పెళ్లి అనగా చిన్న బావ నేను గుడికి వెళ్ళాము. ఎప్పుడు వెళ్లే భావనారాయణం గుడికి.
మెట్లమీద కూచున్నప్పుడు బావ అడిగాడు ,” కావేరీ, నాతో పెళ్లి మనస్ఫూర్తిగా ఒప్పుకున్నావా లేక అమ్మ బలవంతమా? నేను అంత అందంగా కూడా ఉండను, నువ్వింత చక్కగా విరిసిన గులాబీలా ఉంటావు నేను నీ పక్కన సరైన జోడి కాదు కదా “
అమాయకంగా అడుగుతున్న బావ చెయ్యి చేతిలోకి తీసుకుని పెదవులకి ఆనించుకుని, “పూర్తి సమ్మతంతో ఇష్టపడి పెళ్లి చేసుకుంటున్నాను ఏ సందేహాలు పెట్టుకోకు బావా” అన్నాను .
అయినా అపనమ్మకంగా చూస్తున్న బావతో ,” అరేయ్ సూరిగా చెప్తే తెలిదారా..” అనగానే గలగలా నవ్వేసాడు …..
*****
https://www.neccheli.com/2022/08/%e0%b0%95%e0%b0%a5%e0%b0%be%e0%b0%ae%e0%b0%a7%e0%b1%81%e0%b0%b0%e0%b0%82-%e0%b0%b6%e0%b1%8d%e0%b0%b0%e0%b1%80%e0%b0%ae%e0%b0%a4%e0%b0%bf-%e0%b0%a1%e0%b0%bf-%e0%b0%b5%e0%b0%bf-%e0%b0%b0%e0%b0%ae/

———–