రామా రత్నమాల
పల్లె ముఖచిత్రం

నీరవ నిశీధి వేళ జలతారు చంద్రిక వెలుగులో మెరుస్తూ
హేమంత హిమ సుమజల్లులో తడిసే అందచందాలు
సప్తవర్ణ శోభిత హరివిల్లు హొయలన్నీ భువికేగి
రంగవల్లులై విరిసిన ముంగిళ్ళు
పాలికాపు పొలికేకతో పొలాల వైపు పయనించే పద సవ్వడులు
రజని చెక్కిలిపై జాబిలి వెన్నెల సంతకమద్దే వేళ
కష్ట సుఖాల కలబోతలు
శ్రమ జీవన సౌందర్యాన్ని చాటే జానపద జావళీలు
మదిని దోచి అల్లుకునే ఆత్మీయతానురాగలతలు
కాల గమనంలో హిమంలా కరుగుతున్న పల్లె స్వప్నం
ప్రపంచీకరణ పంజాలో చిక్కిన పల్లె అస్తిత్వం
పట్టణ ఛాయలో మారిన పల్లె ముఖచిత్రం
ఎప్పటికీ ఆగని ఋతుగీతం
ఎన్నటికీ తీరని రైతు శోకం
పల్లెలు పూర్వ వైభవ కాంతితో వెలగాలి
హరిత హేమంతో హాలికుని దుఃఖం
దూదిపింజలా ఎగిరిపోవాలి!

———–