డా. నల్లపనేని విజయలక్ష్మి.
ప్రేమ (కవిత)

ప్రేమంటే ఏమిటి? అడిగిందో ప్రేయసిగా
ఎదుటివారి కోసం ఏదైనా చేయగలగడం – చెప్పాడతడు
తన సర్వస్వాన్ని సమర్పించడానికి సిద్ధపడిందామె
ఏదైనా చేయగలగడమంటే
కోట్లు వెచ్చించి కొనుక్కోగలగడం
తత్వబోధ చేసి తాపీగా వెళ్ళిపోయాడతడు
ప్రేమంటే ఏమిటి? అడిగిందో భార్యగా
బాధ్యతగా బ్రతకడమే- బదులిచ్చాడతడు
విరామమే మరిచి
అతడి విలాసానికి వెలుగై నిలిచిందామె
కళాత్మకత తెలియని కఠిన శిలవంటూ
సరస సల్లాపాల డోలలాడించగల
మోహిని ముందు మోకరిల్లాడతడు
ప్రేమంటే ఏమిటి? అడిగిందో తల్లిగా
రక్త మాంసాలను ధారపోయడమే- బదులిచ్చాడతడు
జీవితాన్నే ధారపోసిందామె
రెక్కలొచ్చిన పక్షి
తన గూటిని వెతుక్కుంది
మీలో ఎవరైనా నన్ను ప్రేమించగలరా? అడిగిందామె
అది అన్ కండీషనల్
ప్రేమించడమే నీ వంతు
సమాధానమిచ్చారు ముగ్గురూ!
https://www.neccheli.com/2021/02/%e0%b0%aa%e0%b1%8d%e0%b0%b0%e0%b1%87%e0%b0%ae-%e0%b0%95%e0%b0%b5%e0%b0%bf%e0%b0%a4/

———–