నల్లెల్ల రాజయ్య
ఉరితాళ్ళే గతాయే (కవిత)

అహో ! నా పాలక వర్గమా
మా కడుపులు నింపే
అన్నదాతని అందలమెక్కించి
అంగలారుస్తూ చొంగ కారుస్తవ్ !
దేశానికే ఎన్నెముకలు.
నా రైతన్నలని అదేపనిగా
అంటుంటవ్ !
కని మీ మనసు నిండా
అన్నదాతల ఎన్నెముకల్లోని
మూలుగను సైతం లేకుండా
పీల్చుకతినే నయవంచక
ఎవ్వారం నీది.
నీ మాటల్లో మర్మముంటది
చేతల్లో చెప్పలేనంత
సత్తెన నాశన కార్యాలు
జరిపిస్తుంటవ్ !
గిట్టుబాటు ధరలివ్వని
గిదేం రాజ్యమనీ
ఆగ్రహించిన అన్నదాత
ఆక్రోషిస్తే చేతుల్లకు సంకెళ్ళెస్తవ్
కాదు లేదు పొమ్మంటే కాల్చిపారేస్తుంటవ్ !
ఇగ జూడు ఎవుసాయంల
ఎవ్వల్జేయన్ని ఎక్కడ లేనన్ని
అవ్వల్దర్జ సంస్కరణలూ
సట్టుబండలు చేస్తున్నామని
చాటింపేసుకుంటా
కార్పోరేట్ కంపిన్లకు
కట్టుబానిసవై
అన్నదాతను అగచాట్ల పాల్జేస్తవ్ !
నూతన ఎవుసాయ బిల్లులని
అందినంత అంగబలముందని
ఆమోద ముద్రలేసుకుని
పెట్టుబడిదార్లకే పెద్ద పీటలేస్తవ్
ఆరుగాలం శ్రమించే
అన్నదాతకు అలవికాని దగాజేస్తవ్ !
బహుళజాతి కంపిండ్ల
బద్మాషీగిరిక బాంచెన్ గిరీ
చేసుడు నీ కలవాటైపాయే
అన్నిట్లో ఆగమై
ఎటూపాలుపోని
నా అన్నదాతకు
ఉరితాళ్ళే గతాయే.
https://www.neccheli.com/2021/01/%e0%b0%89%e0%b0%b0%e0%b0%bf%e0%b0%a4%e0%b0%be%e0%b0%b3%e0%b1%8d%e0%b0%b3%e0%b1%87-%e0%b0%97%e0%b0%a4%e0%b0%be%e0%b0%af%e0%b1%87-%e0%b0%95%e0%b0%b5%e0%b0%bf%e0%b0%a4/

———–