డా. మీసాల అప్పలయ్య
ఈ వనము లో నీకు చోటెందుకు? (కవిత)

ఇది జీవన వనం
వర్ణాల
పరిమళాల
రుచుల
తాదాత్మ్యాల
శిబిరం
ఈ రంగుల బొకేలు
నాజూకుని తొడుక్కొని మృదుత్వాన్ని
ఊ రేగించుకొంటున్న సీతాకోక చిలుకలు
నీ పేలవ బ్రతుక్కి రంగవల్లులు , కానీ
ఇవి నీ కర్కశత్వంలో
చెరిగి నలిగిన కళేబరాలు కావచ్చు !
ఆర్ద్రత చిమ్మే ఈ మల్లెలు
పరిమళాల తెమ్మెరలు
పరామర్శల పరవశాలు, కానీ
ఇవి నీ కళింకిత
బూటు కాళ్ల పాశవికత కింద
మాంసపు ముద్దల
శాపాల విస్ఫోటనం కావచ్చు !
నిశ్శబ్దం లో శుచి అయిన కోమలలు
నీళ్ల మేడపై పై నిలబడ్డ
ఈ కలువలు
శాంత జీవన దిక్సూచులు, కానీ
అవి నీ భ్రష్టత్వ ఖడ్గానికి
వివస్త్ర గా నేలకొదిగిన
నమ్రతా భిమానాలు కావచ్ఛు
హరివిల్లు
అందాల గురించిన ముచ్చ్చట్లలో
ఈ చిన్నిపిచ్చుకలు
అతిసున్నిత ఊపిరుల
మధుర స్వరాలు, కానీ
నీ కీచక చూపుల బుల్లెట్ల
సునామీలో
బ్రతుకు మిగలని
దైన్యాలు కావచ్ఛు
ఏ అమానవీయం ఎరుగని
ఈ అమాయకపు లేళ్ళు, కుందేళ్లు
ముద్దు గారే సోయగాల పొదరిల్లు, కానీ
నీ దౌష్ట్యపు దౌర్జన్యపు దండయాత్రలో
జ్ఞాపకానికి కూడా మిగలని
సౌశీల్య చిహ్నాలు కావచ్చు
నిన్నటి దాకా
కరుణను చెమర్చిన
ఈ మాతృత్వ నయనాలు
ఇప్పుడు ఒక యుగాంతాన్ని
వర్షిస్తున్నాయ్
ఒకరి కన్నీరు వల్ల
నీకు కన్నీరు రాకుంటే, ఇంక
ఈ వనము లో నీకు చోటెందుకు?
https://www.neccheli.com/2020/04/%e0%b0%88-%e0%b0%b5%e0%b0%a8%e0%b0%ae%e0%b1%81-%e0%b0%b2%e0%b1%8b-%e0%b0%a8%e0%b1%80%e0%b0%95%e0%b1%81-%e0%b0%9a%e0%b1%8b%e0%b0%9f%e0%b1%86%e0%b0%82%e0%b0%a6%e0%b1%81%e0%b0%95%e0%b1%81-%e0%b0%95/

———–