జూలూరు గౌరీశంకర్

‘పొక్కిలి’తో మొదలైన ప్రస్థానం

  గోలకొండ కవుల సంచిక తర్వాత మొట్టమొదటి సారిగా తెలంగాణ ప్రాంతీయ చైతన్యాన్ని ఆవిష్కరించే బృహత్తర కవితా సంకలనం ‘పొక్కిలి’. ఈ సంకలనానికి జూలూరు గౌరీశంకర్‌ సంపాదకులు. తెలంగాణ కవిత్వ భూమికను, ప్రత్యేకతల్ని వివరిస్తూ గుడిపాటి వివరమైన ముందుమాట రాశారు. ఇది 2002 మే నెలలో వెలువడింది. నల్లగొండ జిల్లాలోని కోదాడకు చెందిన స్పృహ సాహితీ సమాఖ్య దీనిని ప్రచురించింది. ముఖచిత్రకారుడు లక్ష్మణ్‌ ఏలెతో కలిపి 130 మంది తెలంగాణ కంఠస్వరాలకు ప్రాతినిధ్యం వహించే సంకలనమిది. ప్రత్యేక తెలంగాణ రాష్ట్రాన్ని ఆమోదించే వారి కవిత్వం మాత్రమే స్వీకరించడం ఈ సంకలనం ప్రత్యేకత. గోలకొండ కవుల సంచిక వెలువడిన తర్వాత మొట్టమొదటి సారిగా తెలంగాణ నుంచి వెలువడిన బృహత్తర సంకలనం ‘పొక్కిలి’. తెలంగాణ ప్రాంతీయ చైతన్యం పెల్లుబుకుతున్న క్రమాన ఇక్కడి కవుల అభివ్యక్తిని, ప్రాంతీయ ఆకాంక్షలను బలంగా వ్యక్తం చేసిన తీరును చెప్పిన కవిత్వ సంకలనమిది. తెలంగాణ ప్రాంతంలో కవులకు ఒక దిశానిర్దేశాన్ని, ఎజెండాను అందించిన సంకలనంగా ‘పొక్కిలి’ ప్రాధాన్యం సంతరించుకుంది. అంతేగాక తెలంగాణకు చెందిన ఒక బహుజన కవి ఈ సంకలనానికి సంపాదకత్వం వహించడం కూడా అదే మొదటిసారి. అప్పటివరకు తెలంగాణ కవిత్వ సీమలో సంకలనాల సంపాదకులుగా అగ్రవర్ణాలకు చెందినవారే ఉన్నారు. మొదటిసారి జూలూరు గౌరీశంకర్‌ సంపాదకులుగా ‘వెనుకబడిన కులాలు- వెంటాడే కలాలు’ శీర్షికన బహుజన కవిత్వం సంకలనంగా వచ్చింది. ఆ తర్వాత అతనే సంపాదకునిగా ‘పొక్కిలి’ వెలువడింది. తెలంగాణ కవితా సంకలనానికి బహుజన కవి సంపాదకత్వం వహించడం తెలంగాణ సాహిత్యచరిత్రలో తొలిసారి కావడం విశేషం. ఈవిధంగా జూలూరు గౌరీశంకర్‌ తెలంగాణ కవిత్వ చరిత్రలో రికార్డుకు ఎక్కారు. అంతేగాక తెలంగాణ ప్రాంతీయ చైతన్యం ఆరంభ దశలోనే ‘నా తెలంగాణ’ పేరుతో 1998లోనే తొలి ఉద్యమ దీర్ఘకవితను రచించాడు జూలూరు గౌరీశంకర్‌.

———–