| పేరు (ఆంగ్లం) | Chaganty Krishna Kumari |
| పేరు (తెలుగు) | చాగంటి కృష్ణకుమారి |
| కలం పేరు | – |
| తల్లిపేరు | – |
| తండ్రి పేరు | – |
| జీవిత భాగస్వామి పేరు | – |
| పుట్టినతేదీ | – |
| మరణం | – |
| పుట్టిన ఊరు | – |
| విద్యార్హతలు | – |
| వృత్తి | – |
| తెలిసిన ఇతర భాషలు | – |
| చిరునామా | – |
| ఈ-మెయిల్ | – |
| ఫోను | – |
| వెబ్ సైటు / బ్లాగు పేరు, లంకె | – |
| స్వీయ రచనలు | – |
| ఇతర రచనలు | https://www.neccheli.com/2021/01/ |
| ఈ-పుస్తకాల వివరాలు | – |
| పొందిన బిరుదులు / అవార్డులు | – |
| ఇతర వివరాలు | చాగంటి కృష్ణకుమారి ఆంధ్ర విశ్వవిద్యాలయం నుంచి కెమిస్ట్రీలో పరిశొధన చేసి డాక్టరేట్ ను పొందారు. విజయనగరానికి చెందిన ఈమె ప్రముఖ రచయత చాగంటి సోమయాజులు గారి ( చాసో) కుమార్తె. 36 సంవత్సరాల ఉపన్యాసక వృత్తిలో ఆరు సంవత్సరాలు విజయనగరం మహారాజా మహిళాకళాశాలలో, మిగిలిన సంవత్సరాలు సింగరేణి మహిళా కళాశాలలోనూ పనిచేసారు.1993లో ఆసోసియేట్ ప్రొఫసర్ గా పదోన్నతి పొందారు. తెలుగు అకాడమి లో డెప్యుటేషన్ పై రసాయన శాస్త్ర పుస్తక, పదకోశాల ప్రచురణవిభాగంలో పనిచేసారు. వీరు రాయల్ సొసైటి ఆఫ్ కె మిస్ట్రి (RSC)లండన్. సభ్యురాలు. ఇండియన్ కెమికల్ సొసైటి, ఇండియన్ కౌన్సిల్ ఆఫ్ కెమిష్ట్రి, ఇండియన్ సైన్స్ రైటర్స్ అసోసియేషన్,ఇండియన్ సైన్స్ కాంగ్రెస్ అసోసియేషన్ వారి కన్వె న్షన్ ల లోనూ వర్క్ షాపుల్లోనూ పత్రాలను సమర్పించి రెండుసార్లు సర్వోత్తమ పత్ర సమర్పణా అవార్డులను పొందారు.ఆకాశవాణి కేంద్రాలనుండి, ఇందిరాగాంధి సార్వత్రిక విశ్వవిద్యాలయం వారి GYAN VANI కార్య క్రమాలలో వైజ్ఞానిక అంశాలపై సుమారు 80 ప్రసంగాలను ఇచ్చారు. RSC IDLS వారు, స్థానిక విద్యా సంస్థల వారు నిర్వహించిన సెమినార్లు, వర్క్ షాప్ లలో పాల్గొని సుమారు 50 జనరంజన వైజ్ఞానిక ఉపన్యాసాలను ఇచ్చారు. ఈవిడ మంచి ఉపన్యాసకురాలు, పరిశోధకురాలు, అనువాదకురాలు. క్లిష్ట మైన వైజ్ఞానిక విషయాలను చక్కని తెలుగులో ఆసక్తి దాయకంగానూ, సుబోధకంగానూ, సరళంగానూ ఆద్యంతం ఆకట్టుకొనే శైలి లో చెప్పగల రచయిత్రి. ఎం.ఎస్ సి; పి.హెచ్.డి డిగ్రీలను ఆంద్రా యునివర్సిటి నుండి పొందారు. డిగ్రీ స్థాయిలో ప్రతిస్ఠాత్మక బార్క్ (BARC) స్కాలర్ షిప్, ఎం.ఎస్.సి.లో మెరిట్ స్కాలర్షిప్, పిహెచ్ డి ప్రోగ్రామ్లో యు.జి.సి.ఫెలోషిప్ ని పొందారు. 2000 లో లోహ జగత్తు. 2001 లో వైజ్ఞానిక జగత్తు. 2010 లో మేధో మహిళ , భూమ్యాకర్షణకి దూరంగా.. దూర దూరంగా… సుదూరంగా…. 2012 లో రసాయన జగత్తు. 2016 లో వైజ్ఞానిక రూపకాలు. 2017 లో జీవనయానంలో రసాయనాలు 2018 లో వీరి వీరి గుమ్మడి పండు వీరిపేరేమి ? 2019 లో కంటి వైద్యంలో ప్రాచీన భారత దేశ జ్ఞాన సంపద ( నిజానిజాలపై అమెరికా వైద్యనిపుణుల విశ్లేషణ) వంటి వైజ్ఞానిక శాస్త్ర గ్రంధాలను ప్రచురించారు. వీరు రచించిన పుస్తకాలను నేషనల్ బుక్ ట్ర ష్ట్ ,న్యూ ఢిల్లి; తెలంగాణ అకాడమి ఆఫ్ సై న్స స్ ,హైదరా బాద్; వంగూరి ఫౌండేషన్ ఆఫ్ అమెరికా వంటి ప్రతిష్టాత్మక ప్రచురణ సంస్థలు ప్రచురించాయి. ఈమె రాసిన భారతీయ సాహిత్య నిర్మాతలు:చాగంటి సోమయాజులు(చాసో)మోనో గ్రాఫ్ ని సాహిత్య అకాడమి 2014 ప్రచురించింది |
| స్ఫూర్తి | – |
| నమూనా రచన శీర్షిక | జ్ఞాపకాల ఊయలలో-1 |
| సంగ్రహ నమూనా రచన | అవి మారాజునాన్నకాల్చే సిగరెట్టుపెట్టెలలోని తెల్లని ముచ్చికాగితాలు అడిగి పుస్తకాలలో పదిలంగా దాచుకొనే రోజులు;చిన్నిరబ్బరుమూతతోవున్న ఖాళీఅయిన బుల్లిఇంజక్షన్ సీసా రాజునాన్నగారి మెడికల్ షాపు నుండి తెచ్చుకొని పలక తుడుచుకోవడానికి నీటితో నింపుకొన్న రోజులు.పుస్తకాలలో నెమలి ఈకలను దాచి వాటిమీద మూడు,నాలుగు బియ్యపుగింజలువేసి అది పిల్లలు పెడుతుందని మాటిమాటికీ పేజీలు తిరగేసే రోజులు. |
చాగంటి కృష్ణకుమారి
జ్ఞాపకాల ఊయలలో-1
అవి మారాజునాన్నకాల్చే సిగరెట్టుపెట్టెలలోని తెల్లని ముచ్చికాగితాలు అడిగి పుస్తకాలలో పదిలంగా దాచుకొనే రోజులు;చిన్నిరబ్బరుమూతతోవున్న ఖాళీఅయిన బుల్లిఇంజక్షన్ సీసా రాజునాన్నగారి మెడికల్ షాపు నుండి తెచ్చుకొని పలక తుడుచుకోవడానికి నీటితో నింపుకొన్న రోజులు.పుస్తకాలలో నెమలి ఈకలను దాచి వాటిమీద మూడు,నాలుగు బియ్యపుగింజలువేసి అది పిల్లలు పెడుతుందని మాటిమాటికీ పేజీలు తిరగేసే రోజులు. రాజునాన్న మానాన్న చాగంటి సోమయాజులు( చాసో)కి తమ్ముడి వరస.అప్పుడు నేను చదువు తున్నది విజయనగరం చిన్నిపల్లి వీధిబడిలో ఒకటవ తరగతి.బడిమెట్లుఎక్కగానే ఎదురుగా నున్నగదిలో మద్యస్థంగావున్న బల్లకి అవతలవైపునున్న కుర్చీలో హెడ్ మాస్టర్ గారు కూర్చుని వుండేవారు. బల్లమీద నీలం సిరాబుడ్డీలో నీలంకలం, ఎర్ర సిరాబుడ్డీలో ఎర్రకలం వుండేవి. ఆయన పొడుగాటి గెడ్డంతో,మీసాలతో,నల్లగా చాలాభయంకరంగా వుండేవాడు.నన్ను ముద్దుగా చూసుకొనే మానాన్న,రాజునాన్న అలా ఉండరుకదా మరి ! బడికి వెళ్ళనని మారాం, ఎందుకంటే హెడ్ మాస్టర్ గారిని చూస్తే భయం! “ చూస్తే ఎందుకూ భయం?” అని నాన్న అడిగితే“ ఆయనికి అంతంతలేసి గెడ్డాలూ మీసాలూ వుంటాయ్ .. .. నాకు భయం “ – అన్నా. అంతే! నాన్న ఆరోజు నాతో బడికివచ్చి “ ఏమిటయ్యా! ఆ గెడ్డాలు,మీసాలూ ? గెడ్డంగీసుకో!మాపిల్ల నిన్ను చూసి జడుసుకొంటోంది, బడికి వెళ్ళనంటోంది.” అని చెపుతూ నవ్వాడు మానాన్న. ఆయనా నవ్వాడు. అలా మొదలైంది నా పాఠశాల చదువు.(తన పిల్లలు తనని ఏకవచనంతో పిలవాలని కోరుకొన్న మానాన్న మాకు చిన్నప్పటినుండీ అలా అలవాటు చేసాడు).
రంగు రంగుల పలకపుల్లలంటె చాలా ఇష్టం . వాటితో బొమ్మలు గీసేదాన్ని. అన్నయ్య బాపిరాజు కాంపస్ బాక్సు లోని వృత లేఖినిని పట్టుకొని చుట్టూతిప్పుతూ బొమ్మలు గీయడానికి సరదా పడేదాన్ని. మాపెరట్లొ కొబ్బరి, జామ, బొప్పాయి చెట్లుండేవి. బొప్పాయి పచ్చిమట్టను విరిచి గోలెం నీళ్లలో పెట్టి ఊదుతూ బుడగలు తెప్పించడం సరదా.బొప్పాయిగొట్టం నీటిలో వంగినట్టు కనిపిస్తూ బైటకుతీస్తే మామూలుగానే వుండేది . అలా పలుమార్లు పెట్టిచూస్తూ, “ వంగలేదు అలాకనిపిస్తోంది,- అంతే” – అయినా “ ఎందూకలా కనిపిస్తుంది?” అని కూడా అనుకొనేదాన్ని.మా ఇళ్ళు సగభాగం మేడ కాగా, ఆమేడను కలుపుతూ డాబాలు, ఆడాబాలకింద పొడుగాటి వరండాలనానుకొని పెంకుటిల్లువుండేది. పెంకుటింటి భాగంలోనే వంటిల్లు, భోజనాలగది, నట్టిళ్లు. నట్టింట్లో దేముని మంజరం, నాలుగు గొళుసులతో ఉయ్యాలాబల్ల వుండేవి. భోజనాలగది పైన పెంకులమధ్య రెండుచోట్ల గాజుపలకలు చెక్కసున్నంతో బిగించి వుండేవి. అపరాహ్నం వేళ ఆగదిలో రెండు చోట్ల సూర్యకాంతి ఆపలకలనుండీ వచ్చి నేలమీద ఏటవాలుగా, నలుచదరంగా పడేది.ఆవెలుగు మార్గంలో ఏవో చిన్నిచిన్ని రేణువులు మెరుస్తూ అటుఇటూ, ఎటుపడితే అటు వేగంగా పరిగెడుతూ చీకటిభాగంలోకి పోతూ మరిక కనిపించేవికావు .కాని వెలుగు పడుతున్న మేర , పడుతున్నసేపూ అటువంటి రేణువులు అడదిడ్దంగా పరుగులు పెడుతూ మెరిసిపోతూ వుండేవి. వాటివంక నేను ఆశ్చర్యంగాచూస్తూ వుండేదాన్ని. చీకటి భాగంలోకి వెళ్లినవి ఎటుపోయాయ్?అంటె ఈ గదినిండా అటువంటి రేణువులున్నాయన్న మాటేగా! నాచుట్టురావున్నాయాఅవి? నేను వాటిమధ్యన వున్నానా? అవి నన్ను తగులుతున్నాయా?అన్నీ ప్రశ్నలే! అవకాశంవున్నప్పుడల్లా ఆసమయానికి వాటిని చూస్తూవుండే దాన్ని. ఇలాంటి రేణువులు నన్ను తరచూ విస్మయంలో పడేస్తూ వుడేవి . తూర్పువరండాకున్న కిటికీ నిలువు ఊచలనుండి ఉదయపు సూర్యకాంతి దూరుతూ గదిలో వెలుగు రేఖలను ఏటవాలుగా ఏర్పరచగా ఆ రేఖలలో పిచ్చిపట్టినట్టు ధూలిరేణువులు అడ్డదిడ్డంగా పరుగులుపెడుతూ కనిపించేవి.కాంతి పడని నలుపు భాగంలోకి వెళ్లీ వేళ్లగానే మరికనిపించేవి కావు.వరండాని ఆనుకొన్న పెరట్లో మూడు రాళ్ల పొయ్యమీద రాగి డెగిసా పెట్టి ఎండు కొబ్బరాకులూ మట్టలతో స్నానాలకి నీళ్ళు కాచేవారు. విసెన కఱ్ర తో విసరగా పొయ్యనుండి లేచిన పొగ వేవేగంగా గదిలో పడ్ద కాంతి గీతలలోకి పరుగులు పెట్టేది. అందులో కొన్ని రేణువులు మరీ ధగధగా మెరిసిపోతూ చీకటి భాగంలోకి జొరబడుతూ అదృశ్యమయిపోయేవి.
సైన్స్ అంటే ప్రకృతిని తరచితరచి చూసి సత్యాన్ని తెలుసుకోవడం.తెలుసుకొన్నదాన్ని మానవ మనుగడకుపయోగపడే నూతన వస్తువులుగా, పరికరాలుగా మర్చగలగడం సంకేతిక పరిజ్ఞాణమవుతుంది.ప్రకృతిని అనుకరిస్తూ “బయో మిమిక్రీ” అనే పరికల్పనతో ‘ బులెట్ ట్రైన్’ వంటి ఎన్నో ఆవిష్కరణలు జరిగాయి;జరుగుతున్నాయి. పరిశీలన, కుతూహలం , ప్రశ్నించే తత్వం, ప్రతీ పసిపాపకూ వుంటాయి. అవే ఒకనాడు ఆ పాప లేదా పాపడిని ఎదోఒకనాటికి “ బ్రేక్ త్రూ” పరిశోధకులుగా నిలబెట్ట వచ్చు . ఎందుకు చెపుతున్నానంటే ఆనాటి నాలో వున్న ఆపాపాయికి కాలం కర్మ కలిసిరాకపోబట్టికానీ , కలిసొస్తే ఏమో ఎవరికితెలుసు మన దేశానికి నొబెల్ తెచ్చి పెట్టిన తొలి భారతీయ వనిత అయ్యేదేమో సుమండీ! ప్చ్ ! ఏంచేస్తామ్ ? जो मिल गया उसी को मुकद्दर समझ लिया,जो मिल गया उसी को मुकद्दर समझ लिया मुकद्दर समझ लिया, मुकद्दर समझ लिया…… అని నేను సరిపెట్టుకోగలిగినా మన దేశపు ఆడపిల్ల అందునా తెలిగింటి ఆడపిల్ల తెచ్చుకోవలసిన నోబెల్ ని తెచ్చుకొనే అవకాశం పోయిందే అని బాధపడుతున్నా . పర్వాలేదులెండి, ఈనాటి తెలుగింటి ఆడపిల్లలు అన్ని రంగాలలోనూ చాకుల్లా తయారవుతున్నారు. వారుతెచ్చి పెట్టకపోతారా! అని ఆశతో ఎదురుచూస్తున్నాను . అన్నట్టు నన్ను యూనివర్సిటిలో “చాకు “ అని మొగపిల్లలు అనుకొనేవారట! ఈమాధ్యనే ఆసంగతి తెలిసిందిలెండి . నిఝంగా చాకు కాదూ, పేరులోని అక్షారలతో తయారైన నిక్ నేమ్ అని తెలిసిపోతూనే వుందిగా !
విజయనగరం చిన్నిపల్లి వీధిలోని మాఇల్లు నాబడికి చాలాదగ్గర. నేను ఆఇంట్లోనే పుట్టానుట.“ ట’ అని ఎందుకన్నానంటె ఎవరో చెపితేనే కదా ఆసంగతి తెలిసేది.“ జేష్టమాసం – అమావాస్య వెళ్ళాక పున్నమి ముందు సప్తమినాడు పుట్టావు, నాన్నగదికి ఆనుకొనివున్న పంచపాలీలో పుట్టావ్ ” అని అత్తయ్య చెపుతూ వుండేది.“మీరంతా అక్కడే పుట్టారులే !ఒక్క అమ్మజీ తప్ప ! అమ్మజీ తొలి చూలు పిల్లకదూ !అందుకది తాతగారింట్లో- కడలిలో పుట్టింది” అనేది. అమ్మజీ నాకు పెద్దక్క. నాకంటే 14 ఏళ్లు పెద్దది , దాని తరువాత తులసి,బాపిరాజులు.బాపిరాజు తరువాత శ్రీనివాసు మూడేళ్ళ వయసులో జబ్బుచేసి చనిపోయాడట!ఆ శోకంలో- పసిపిల్ల ఇంట్లో తిరుగాడాలని కోరికోరి ఎదురుచూసి అమ్మనాన్నలు నన్ను కన్నారుట.నాకోసం గర్భవతి అయిన మాఅమ్మ భాగవతం చదివిందట!అందుకే నాకు శేషకృష్ణకుమారి అని పేరు పెట్టారుట! శేషమ్మగారు మా అమ్మమ్మ. బళ్లో చేర్చినపుడు“ శేష” ని మానాన్న తొలగించాడుట. ఆనాటి ఉమ్మడి కుటుంబాలలో ఇటువంటి కబుర్లు తరచుగా చెప్పుకొంటూవుండేవారు. అందువల్ల నేను పెద్దాయ్యాక ఆ సంగతులు నాచెవులో పడ్డాయి.అమ్మానాన్నలకి, నేను ‘ terribly wanted child’ని కదా అని నాకేదో తెలియని ఆనందం!
పెద్దక్క అమ్మజీ నాకు రెండు జడలు వేసి పువ్వులు పెట్టి స్కూలుకేకాదు,16 ఏళ్లు వచ్చినా కాలేజీలో డిగ్రీ క్లాసుల వరకు పంపింది. ఒకసారి తను ఊరెళ్ళినప్పుడు నాజడలు నేను వేసుకొన్నాను. తిరిగొచ్చి జడలు వేస్తూ “ నాచేతుళ్లో వున్నంత దాకా జుత్తుబాగుంది, జుత్తు అంతా పాడైపోయింది ఎంత వూడిపోయిందో !” అం టూ వాపోయింది ! ఇప్పూడాసంగతి గుర్తుకొచ్చి ఆకాసిన్ని రోజులలొ జుత్తులో వచ్చిన మార్పు ఆవిడకు కనిపించిందా! అని నవ్వుకొంటాను.అంత అపురూపంగానన్ను చూసుకొనేది.ఈమధ్య డిగ్రీ క్లాస్ మేట్ ప్రభావతిని కలిసి నపుడు “ అమ్మాజీఅక్క నిన్ను ఎంత ప్రాణపదంగా చుసుకొనేదో కదా అంది!” నిజమే మరి!! అందుకే, అనుక్షణం గుర్తుకొస్తూనే వుంటుంది. గౌనులనుండి,లంగావోణీల స్థాయిదాకా ఇంట్లోనే చేతి కుట్టుతోనే గౌనులు, జాకట్లు కుట్టేవారు. మాఅత్తయ్య కత్తిరించి ఇస్తే అమ్మాజీ, కుడుతూ వుండేది అమ్మాజీ నాకు అన్ని రకాల కుట్లూ – ఎంబ్రయిడరీ తోసహా నేర్పింది.
తను సంగీతం నేర్చుకొంది.అమ్మ పండగలకి దేముని మడపందగ్గర పూజయ్యాక అమ్మజీని అమ్మవారిమీద కీర్తనలు పాడమని అడిగేది.‘ అంబవాణి నన్నాదరించవే …’ వంటి కీర్తనలు చాలా పాడేది. . చాగంటి గంగబాబు గారు మాఇంటికి వచ్చి తనకి సంగీతం నేర్పిస్తూవుండేవారు. ఉయ్యాలలో నన్నువళ్లో కూర్చోపెట్టుకొని “ బంగారు పాపాయి బహుమతులు పొందాలి, మాపాప చదవాలి మామంచి చదువు “ అంటూ పాడేది. నన్నుఇంట్లో పాపాయి అని పిలుస్తారు.పసిపిల్లగా పాటవింటున్న నేను ఆపాపాయిని నేనే అనుకొనేదాన్ని.సాధారణంగా పెద్దవాళ్ళు స్కూలు కెళుతున్నవయసులోనున్న పిల్లలకు “ఇంక పుస్తాకాలు తీసి చదువుకో” అని చెపుతూ వుంటారు కదా! మానాన్న ఒక సారి “ పాపాయికి ఎప్పుడూ ‘ చదువుకో’ – అని చెప్పలేదు” అన్నాడు. నాచిన్నతనంలో అమ్మాజీఅక్క పాడిన పాటల,కీర్తనల ప్రభావం నామీద చాలావుంది. “ I am sixteen going on seventeen” అని నేను పాడుకొనే వయసులో తను చనిపోవడం నాకు తగిలిన అతిపెద్ద దెబ్బ! అయితే, జీవితంలో దుఖ్ఖాలను దిగమింగుకోగల శక్తిని తనసప్తస్వరాల శ్రావ్య కంఠస్వరం నుండే పొందాను.
https://www.neccheli.com/2021/01/%e0%b0%9c%e0%b1%8d%e0%b0%9e%e0%b0%be%e0%b0%aa%e0%b0%95%e0%b0%be%e0%b0%b2-%e0%b0%8a%e0%b0%af%e0%b0%b2%e0%b0%b2%e0%b1%8b-%e0%b0%ad%e0%b0%be%e0%b0%97%e0%b0%82-1/
———–
