అదృష్టదీపక్

సామాజిక సమస్యలకు ప్రతిస్పందించే హృదయ సౌకుమార్యంవుంది అదృష్టదీపక్ కు. తన అనుభూతులకు కవితారూపం యిచ్చే నేర్పుకూడావుంది యితనికి.. -రాచమల్లు రామచంద్రారెడ్డి

అదృష్టదీపక్ కు తన లక్ష్యం యేమిటో, దాన్ని యెలా సాధించాలో తెలుసు. వర్తమాన సమాజం పట్ల తీవ్ర అసంతృప్తి అంతరంగంలో ప్రజ్వలిస్తున్నా దాన్ని వ్యక్తీకరించడంలో ఎంతో నిగ్రహాన్ని ప్రదర్శిస్తాడు. “అక్షరాల రెక్కలు విప్పుకుని ” “కన్నీళ్ళు కవిత్వంగా” మారుతాయంటాడు.”కొడిగట్టిన ఆశను కొత్తకోరికలతో తిరిగి రగిలించు” అంటూ భవిష్యత్తు పట్ల అనంతమైన ఆశను ప్రకటిస్తాడు అదృష్టదీపక్.- గజ్జెల మల్లారెడ్డి

అదృష్టదీపక్ సముద్రాన్ని కమండలంలో ఇమిడ్చిన ఋషిలాగ…పైకి కనపడడు! ఆయనో చల్లని అగ్నిపర్వతం! వెచ్చని హిమాలయం! గులాబీలా కనిపించే విచ్చుకత్తి! మొగలిరేకులా అనిపించే మల్లెపువ్వు! ఆయన తక్కువే రాస్తాడు…ఎక్కువగా గుర్తుండి పోయేలాగ! ఆయనెప్పుడూ వీరబాహుడిలాగ – భుజాన కుండొకటి పెట్టుకొని తిరుగుతూ ఉంటాడు. ఎవరన్నా అభిప్రాయం అడిగితే – నిర్మొహమాటంగా ఆ కుండని మొహాన్న భళ్ళున కొడతాడు! నిజం చెప్పటం ఆయనకిష్టం. దానివల్ల ఆయన చాలా దెబ్బలు తినిఉండొచ్చు కానీ- ప్రతిదెబ్బా ఆయన పాలిట ఓ గోల్డ్ మెడల్ కదా! ఎంచేతంటే వీరుణ్ణి ఎప్పుడైనా గాయాలతోనేగదా గుర్తించాలి! – తనికెళ్ళ భరణి.

ఇంతమంది శత్రువుల్ని సంపాదించుకున్న అదృష్టదీపక్ ను ఇలాగే ఉండమని అభినందిస్తున్నాను…- బ్నిం

అదృష్టదీపక్ మంచి కవిమాత్రమే కాదు. నిజాయితీగల విమర్శకుడు కూడా అని అర్ధమవుతోంది.నిబద్ధత ముసుగులో ఉన్న కవులూ, రచయితలూ చాలామంది ఉన్నారు. కాని అదృష్టదీపక్ లోపలా, బయటా కూడా నూటికి నూరుపాళ్ళూ నిబద్ధుడైన రచయిత! – ద్వా.నా.శాస్త్రి

రసికుం డదృష్ట దీపకు డసమానమ్మైన కవిగ నాంధ్రావనిలో కుసుమించిన చెంగలువగ వసియించుచునుండు సతము ప్రజల మనములన్ – డాక్టర్ రాధశ్రీ

———–